Gipadayag sa bag-ong gitudlong Ombudsman nga si Jesus Crispin ‘Boying’ Remulla nga iyang abrihan sa publiko ang Statement of Assets, Liabilities, and Net Worth (SALN) sa mga opisyal sa gobyerno.
Sa iyang unang adlaw sa pagserbisyo isip ikapito nga Ombudsman, iyang gipahibalo nga mohimo siya og bag-ong polisiya aron ang katawhan makakuha og access sa maong dokumento.
Matod niya, plano niyang magpagawas og memorandum sunod semana aron tukuron ang mga sumbanan kung giunsa paghangyo og kopya sa SALN.
Apan, iyang gipasabot nga bisan pa nga ipasundayag sa publiko ang SALN, kinahanglan gihapon tagdon ang seguridad sa nasud, aron kini dili magamit o mahimong armas batok sa mga opisyal.
Samtang, gipahibalo usab ni Ombudsman Remulla nga iyang tan-awon pag-usab ang isyu sa Pharmally scandal.
Matod niya, ilahang usisahon pagbalik ang maong kaso nga nahitabo panahon sa pandemya.Nagtuo siya nga dili angay kalimtan ang isyu sa Pharmally ug kinahanglan balikan aron masayran ang tinuod nga kamatuoran.
Kahinumduman nga sa nangaging mga pagdungog sa Senate Blue Ribbon Committee, gisusi ang isyu sa bilyones nga pondo sa Department of Health nga gigamit sa pagpalit og mga overpriced nga medical supplies atol sa pandemya.
Gidugang pa ni Remulla nga dili siya pamilyar pag-ayo sa maong isyu, tungo wala siya nakatutok niini kaniadto.
Apan iyang gisiguro nga walay pinalabi, bisan kinsa pa nga opisyal ang malambigit niini, subay sa klaro ug lig-on nga mga ebidensya.
