Nakasakmit ang Police Regional Office XI (PRO XI) og gibanabanaan nga nagkantidad og ₱17.2 milyon sa ilegal nga druga sa tibuok kwerpo sa kapulisan sulod sa usa ka bulan nga operasyon.
Subay sa gipaguwang datos sa kapulisan, sa 328 ka mga gipakusgang operasyon sa tibuok Davao Region sulod sa tibuok bulan sa Agosto ang mga operatiba sa PRO XI malampusong nakadakop sa 91 ka mga high-value individuals ug 275 ka street-level individuals sa maong panahon.
Tungod niini gidayeg ni PRO XI Director Brigadier General Joseph Arguelles ang dedikasyon sa mga ginsakpan niini sa gipahigayon nga mga operasyon ug iyahang gihatagan og pagtagad nga kining mga kalampusan nagpakita kini sa ilahang tinuod nga katumanan nga nahisubay sa kamanduan sa ilahang mandato mahitungod sa pagpakgang sa iligal nga droga sa nasud.
Gipasabot usab sa opisyal nga ang ilahang pagpaningkamot dako’g papel sa pagpanalipod sa seguridad ug sa tinguha nga mahimong luwas sa druga ang rehiyon.
Samtang nagpahimangno usab ang opisyal sa mga katawhan nga nagapadayon pa sa kalihokan sa iligal nga druga, nga ang PRO XI magpadayon sa pagpakusog sa mga operasyon hangtod ang tanang high-value drug personalities ug uban pang mga malapason sa balaod mag-atubang sa silot subay sa balaod.
