Gipadaplin una sa Pre-Trial Chamber I sa International Criminal Court (ICC) ang nakatakdang pagdungog alang sa “confirmation of charges” batok ni kanhi Pangulong Rodrigo Duterte, nga orihinal nga gitakda sa Setyembre 23, 2025.
Ang desisyon resulta sumala pa sa hangyo gikan sa kampo ni Duterte nga madugay ang pagdungog tungod sa ilahang pamahayag nga dili na siya “fit to stand trial” o dili na siya makadumala sa pag-atubang sa korte tungod sa kahimtang sa iyang panglawas.
Sumala sa ICC, limitado lamang ang postponement nga ilahang gipatuman aron hatagan og panahon ang pagsulbad sa maong hangyo ug uban pang adunay kalabutan nga isyu.
Nagpagawas ug dissenting opinion si Judge María del Socorro Flores Liera, nga supak sa pagpasibog sa pagdungog.
Kahinumduman nga gi-aresto si Duterte niadtong Marso 11, 2025, nga may kalabutan sa mga kasong crimes against humanity, lakip ang pagpatay, pagpanglutos (torture), ug uban pa nga giingong nahitabo sa panahon sa iyang pagpangulo sa dakbayan sa Davao ug sa panahon sa iyang administrasyon isip Presidente sa Pilipinas.
Ang tumong sa “confirmation of charges” hearing mao ang pagtino kung aduna bay igo nga ebidensya aron ipadayon ang kaso ngadto sa trial phase.
Kung makumpirma ang mga pasangil, isang-at ang kaso ngadto sa Trial Chamber alang sa pormal nga pagtaral sa kaso.
