Opisyal nang giabrihan ang Davao Gulf alang sa pagpanagat sugod Setyembre 1, human sa tulo ka bulan nga closed fishing season, sumala sa Bureau of Fisheries and Aquatic Resources (BFAR) Region XI nga mipahibalo niadtong Lunes.
Ang temporaryong pagdili sa pagpanagat nga nagsugod sa Hunyo 1 hangtod Agosto 31 gibase sa Joint Administrative Order No. 02, series of 2014 sa Department of Agriculture (DA) ug Department of Interior and Local Government (DILG).
Gitoyo kini aron nga maprotektahan ang mga small pelagic species sama sa pero dili limitado sa matambaka kon big-eyed scad, karabalyas kon mackerel, ug galunggong kon round scad).
Sumala ni BFAR XI Regional Director Relly B. Garcia, nga ang seasonal closure kabahin sa ilahang long-term nga estratehiya aron maseguro ang kalapdon sa kadagatan sa Davao Gulf.
Nasayran nga ang Davao Gulf, adunay gibanabanaan nga 5,200 square kilometers, diin giila nga critical breeding ground sa gagmay ug dagkong matang sa isda, lakip na ang mga species nga sakop sa CITES kon Convention on the International Trade of Endangered Species.
Sa pagkakaron, adunay 19 ka mga marine protected areas sa lima ka syudad ug lima ka lungsod nga nagpalibot sa Davao Gulf.
Subay sa Philippine Statistics Authority, ang Davao Region nakaproyos na og 16,126 metric tons nga isda sa unang quarter karong tuiga diin misaka og 17.8% kung itandi sa samang panahon sa 2024.
Sa maong kinatibuk-an nga ihap, 62% niini gikan sa commercial ug marine fishing, nga naglangkob og 2,321.56 metric tons nga commercial ug 7,646.23 metric tons sa marine.Gipahibalo sa BFAR XI nga ang mga naapektuhang mananagat nakadawat og tabang atol sa closed season.
Samtang ang DSWD XI nag-apod-apod og 3,271 ka mga food packs sa tibuok rehiyon.Ang DA XI nagtunol usab og 398 ka mga manok ug 12 ka mga kanding sa Davao del Sur, Davao Occidental, ug Davao City.
Samtang aduna pa’y pending nga livestock dispersal depende sa availability.
Ang DOLE XI nagtudlo og 200 ka mga slots alang sa short-term employment ubos sa TUPAD program (Tulong Panghanapbuhay sa Ating Disadvantaged/Displaced Workers).
