Gilaraw sa Davao City Council ang pag-amyenda sa pipila ka balaod-trapiko sa syudad human misaka ang ihap sa mga aksidente sa kalsada.
Matod ni Oversight Committee Chair ug Assistant Floor Leader Councilor Diosdado Angelo Junior Mahipus, lakip sa tan-awon nga bag-ohon ang local design standards ug intersection control sa mga lugar nga giila nga accident-prone sama sa C.P. Garcia Highway o Diversion Road, McArthur Highway, Cabantian, Panacan, ug Maa Road.
Istriktohon usab, sumala ni Mahipus, ang pagbawal sa paggamit og cellphone samtang nagmaneho ug palig-onon ang implementasyon sa balaod uban ang ubang pamaagi aron mapugngan ang disgrasya.
Ang Konseho magtinabangay uban sa City Transport and Traffic Management Office, Traffic Enforcement Unit sa Davao City Police Office, Department of Public Works and Highways, City Planning Office ug City Engineer’s Office aron mas mapaayo ang pagpatuman sa balaod-trapiko.
Base sa datos sa Traffic Enforcement Unit sa DCPO, misaka og 36% ang ihap sa mga aksidente sa Davao City gikan Enero hangtod Hunyo karong tuiga.
Naabot kini sa kapin 2,500 ka kaso, mas taas itandi sa hapit 1,900 ka aksidente nga natala sa samang panahon niadtong milabayng tuig.
