Usa ka lalaki nga latagaw sa Brazil ang nagbaton og kahigayunan nga ma-usab ang iyang kinabuhi human nag-viral ang video nga misalmot kini sa usa ka 8-kilometer fun run samtang naka-tsinelas lamang.
Subay sa report, nakahukom si Isaque dos Santos Pinho, 31 anyos nga mosalmot sa usa ka fun run sa ilang lugar sa Garrafão do Norte niadtong milabay nga adlaw.
Ang iyang rason, nakainom siya niadtong tungura ayha ang event ug iyang nahunahunaan nga ang pagdagan ang makatabang kaniya aron mahuwasan siya sa iyang hangover.
Bisan og dili siya rehistrado ug naka-tsinelas lamang, nakig-dungan siya sa mga entrante. Nakuhaan sa usa ka drone camera ug paspas nga mikatag sa social media ang gibuhat sa maong lalaki.
Gani, bisan og wala niini napabilin ang gikusgon sa iyang pagdagan sa tibuok 8 kilometer run, nahuman gihapon niya ang karera ug nakadawat ug medalya. Ang iyang estorya ang paspas nga nahimong national headline sa Bazil.
Si Isaque, nga nagdako sa kakabus ug nahimong biktima sa alcoholism ang nakahukom nga gamiton ang atensiyon aron mag-bag-o na sa iyang kinabuhi.
Human nag-viral ang iyang video, nagsugod na siya nga makadawat ug mga donasyon sama sa mga mahalong sapatos, nindot nga mga senina, ingon man daghanang mga imbitasyon aron mag training kauban ang mga propesyonal nga mga runner.
Mapasigarbuhong gikanayon ni Isaque nga mi-undang na siya sa iyang pagka-palahubog gumikan kay buot niyang seryosohon ang iyang bag-ong career.
Dugang pa niini, hingpit na niyang gi-usab ang iyang kinabuhi ug buot pa niini mas mapalambo ang iyang pamuyo.
