Gi-raid sa mga operatiba sa NBI South Eastern Mindanao Regional Office ang usa ka ilegal nga POGO hub sulod sa usa ka pribadong subdivision sa Buhangin, Davao City karong hapon, Agosto 12.
Ang operasyon miresulta sa pagdakop sa walo ka Chinese nationals nga gituohang nagpadagan sa maong pasilidad. Sa gihimong pagsusi, nakumpiska sa mga awtoridad ang kapin sa napulo ka mga computer nga gigamit sa operasyon sa hub.
Base sa inisyal nga impormasyon, Abril pa ning tuiga nag-arkila og balay sulod sa subdivision ang mga suspetsado aron mapadayon ang ilang kalihokan nga ilegal.
Gisiguro sa NBI nga ipadayon ang imbestigasyon aron masuta ang tibuok sakop sa operasyon ug ang posible nga koneksyon niini sa mas dako pang network sa online gambling.
Sa karon, ang mga nadakpan anaa na sa kustodiya sa NBI samtang nagpadayon ang legal nga proseso batok kanila.
