Gipadayag sa Filipino-Canadian actor nga si Manny Jacinto ang iyang interes nga maghimo ug pelikula sa Pilipinas, dili lamang isip aktor apan apil usab sa pagpanulat sa mga istoryang puwede i-shoot sa nasud.
Gipahibalo niini nga kasamtangan siyang nagahimo ug istorya kabahin sa sabong, apan klaro niyang gipasabot nga walay kalabotan kini sa isyu sa mga nangawalang sabungero.
Bisan pa nga tulo pa lang siya ka tuig sa dihang nibalhin sa Canada, nasabtan gihapon niya ang pinulongang Filipino ug aduna pa siyay mga paryente sa Pilipinas, ilabi na sa bahin sa iyang amahan.
Gipaambit usab ni Manny ang iyang kasinatian sa Hollywood, lakip na ang daghang rejection nga iyang nasinati isip usa ka Asian ug Filipino actor.
Kahibaloang nga mibisita si Manny Jacinto sa Pilipinas aron i-promote ang iyang bag-ong pelikula nga “Freakier Friday”, ang sequel sa 2003 film nga Freaky Friday, diin iyang ginaplay ang karakter nga si Eric Reyes — usa ka Filipino-British chef nga ikasal sa karakter ni Anna Coleman (Lindsay Lohan).
