Patay ang pito ka mga tawo, lakip na ang usa ka 6-anyos nga bata, human sa gihimong aerial strike sa Russia nga miigo sa pipila ka mga residential buildings sa Kyiv, sumala ni Ukrainian President Volodymyr Zelenskyy.
Sumala usab sa mga awtoridad, kapin sa 300 ka drones ug unom ka missiles ang gipagawas, nga kasagaran gitarget ang kapital nga siyudad.
Dili moubos sa 64 ang naangol, ug 50 sa ilaha ang gidala sa ospital.
Siyam niini ang mga bata.
Gitumbok ni Zelenskyy ang maong pag-atake isip malisyoso ug tinuyo aron mapuno ang kapasidad sa air defense system.
Matod ni Tymur Tkachenko, labaw sa Kyiv military administration, 27 ka lugar sa siyudad ang naigo sa pagpangatake.
Usa sa direktang naigo ang nahimutang sa Sviatoshynskyi district, diin naguba ang usa ka building.
