Nagpakitang-gilas ang Filipino-Canadian tennis star nga si Leylah Fernandez human niya gibuntog ang Russian player nga si Anna Kalinskaya sa straight sets, 6-1, 6-2, aron makuha ang titulo sa DC Open niadtong Domingo.
Kini ang unang higayon nga nakuha ni Fernandez ang WTA 500 title ug unang championship sukad pa niadtong 2023.
Kapin lang usa ka oras ang gidugayon sa maong duwa, diin klaro ang iyang dominasyon.
Sa miaging rounds, napildi usab niya ang top seed nga si Jessica Pegula ug kanhing Wimbledon champion nga si Elena Rybakina.
Kini na ang ika-upat ka WTA title sa iyang karera.
Gitapos ni Fernandez ang unang set sulod lang sa 30 minutos, ug dali sab siyang nakalamang sa ikaduhang set hangtod maisara ang duwa sa ikaduhang match point.
Sunod nga moatubang si Fernandez sa mas bug-at nga hagit sa WTA 1000 Canadian Open sa Montreal.
