Gipahibalo ni Philippine National Police (PNP) spokesperson Brig. Gen. Jean Fajardo nga nakolekta na ang DNA samples sa 12 ka pamilya sa mga na-missing nga sabungero, ug nagpaabot na lamang sila sa opisyal nga resulta nga ipagawas sa PNP Forensic Group.
Ang mga resulta ang magahatag og kasayuran kung aduna bay match sa DNA tali sa mga gikuha nga samples ug sa mga posibleng “human remains” nga narekober sa Taal Lake.
Kung adunay magtugma, kini matod pa ni Fajardo, mopalig-on sa mga ebidensiya nga tinuod nga gipatay ang 34 ka mga na-missing nga sabungero.
Kahinumduman nga nagsugod ang retrieval operations sa Taal Lake niadtong Huwebes sa miaging semana, nga miresulta sa pagkarekober sa lima ka sako, lakip na ang usa nga adunay gidudahan nga lawas sa tawo nga gisunog.
Gipangita kini sa mga diver sa lakebed, nga nahimutang 10 metros ang gilay-on gikan sa baybayon sa Barangay Balakilong, Laurel, Batangas.
Ang Philippine Coast Guard (PCG) maoy naghimo sa search and retrieval operations human sa pahayag ni Julie Patidongan alias “Totoy”, usa sa mga suspek ug whistleblower, nga gitambog sa lawa ang mga patay nga lawas sa gipangpatay nga mga sabungero.
