Gisuspinde sa Land Transportation Office (LTO) ang driver’s license sa internet personality ug negosyante nga si Josh Mojica, 21-anyos, human nalambigit sa usa ka kalapasan sa balaod trapiko.
Gikompirma sa LTO sa ilahang opisyal nga pamahayag nga nag vlog si Mojica samtang nagmaneho diin naggamit og cellphone aron videohan ang iyahang kaugalingon, tataw nga usa kini ka paglapas sa Anti-Distracted Driving Act.
Sumala pa ni LTO Chief Assistant Secretary Vigor Mendoza II, dili rason ang klase o kantidad sa sakyanan aron dili mutamod sa balaod.
Base sa Show Cause Order (SCO) nga gi-isyu sa LTO-Intelligence and Investigation Division ilawom sa pagpanguna ni Chief Renante Melitante, nag-atubang si Mojica og kasong Reckless Driving, paglapas sa Anti-Distracted Driving Act (Sec. 4 sa R.A. No. 10913), ug pagka-Imprudent Person to Operate a Motor Vehicle (Sec. 27(a) sa R.A. No. 4136).
Ang katapusang kaso posibleng moresulta sa kanselasyon sa iyahang lisensiya.
Gawas sa suspensiyon, gipahimangnoan usab si Mojica nga motubag sa LTO aron ipasabot kung ngano nga dili siya angay silotan sa administrative penalties.
Samtang gilakip na sab sa LTO sa alarm list ang iyang Porsche, samtang nagpadayon ang imbestigasyon.
Kahinumduman nga nailhan si Mojica niadtong 2021 human nga nag-viral ang iyang istorya sa kinabuhi sa pagpaninda og homemade kangkong chips.
Sukad kaniadto, nailhan siya isip batang negosyante ug influencer.
Gipasiugda sa LTO nga ang kasikatan ug kadato dili excuse aron kalimtan ang kaluwasan sa kalsada.
