Makasaysayan ang naangkon sa International theater icon nga si Lea Salonga human pormal nga mapili isip unang Pilipino nga gihatagan og Star sa Hollywood Walk of Fame.
Gibutyag sa Tony Award-winning actress ang maayong balita pinaagi sa iyang Instagram Stories, diin iyang gi-repost ang artikulo sa music publication nga Billboard.
Matod pa ni Lea mapasalamaton siya sa Manila International Film Festival sa pag-nominar kaniya isip kabahin sa class of 2025-2026.
Sumala sa Billboard, igahatag ang fame star kang Salonga sa tuig 2026 sa California.
Kauban niya sa batch ang mga personalidad sama nila Miley Cyrus, Timothée Chalamet, Emily Blunt, ug Rachel McAdams.
Wala pa gitakda ang eksaktong petsa sa seremonya, apan ang mga gipasidunggan adunay hangtod sa duha ka tuig gikan sa petsa sa pagpili aron mahatag ang ilang fame star.
Gawas sa maong dungog, si Salonga bag-ohay lang usab nakadawat og nomination alang sa Distinguished Performance Award sa 2025 Drama League Awards tungod sa iyang performance sa “Stephen Sondheim’s Old Friends” sa Broadway.
Sa Agosto, gilauman nga makita usab siya sa Philippine staging sa “Into the Woods” diin gampanan niya ang papel nga The Witch, samtang ang iyang anak nga si Nic Chien magdula sa papel ni Jack.
Usa kini ka dakong garbo sa nasud, ilabi na sa mga Pilipinong nagtinguha nga makasulod ug makaila sa international nga entablado.
