Usa ka Air India nga biyahe gikan sa Phuket, Thailand paingon sa kapital sa India nga New Delhi, nakadawat og hulga sa bomba samtang naa sa eroplano karong adlawa ug napugos sa pag-emergency landing sa maong isla, sumala sa mga awtoridad sa tugpahanan.
Ang tanang 156 ka pasahero sa flight AI 379 gibana-banang gihatud gikan sa eroplano subay sa mga emergency plan, matod pa sa opisyal sa Airports of Thailand (AOT).
Nasayran nga ang maong eroplano milupad gikan sa tugpahanan sa Phuket padulong sa kapital sa India alas 9:30 sa buntag (0230 GMT), apan nakalupad na kini sa Andaman Sea ug mibalik og landing sa habagatan nga isla sa Thailand, base sa flight tracker nga Flightradar24.
Ang maong insidente misunod sa pag-crash sa laing Air India nga biyahe sa Ahmedabad kagahapong adlawa (Huwebes), pipila lang ka minutos human molupad, diin kapin sa 240 ka tawo ang namatay.
Walay detalye pa nga gipagawas ang AOT kabahin sa hulga sa bomba. Ang Air India wala pa usab mohatag og opisyal nga komento kabahin sa maong panghitabo
Nasayran nga niadtong miaging tuig, daghang Indian airlines ug mga tugpahanan ang nakadawat og mga peke nga hulga sa bomba, diin halos 1,000 ka hoax calls ug mensahe ang nadawat sa unang napulo ka buwan kapin napulo ka higayon nga ihap sa tuig 2023.
