Gipahimangnuan sa City Disaster Risk Reduction and Management Office (CDRRMO) ang mga Dabawenyo nga masayud ug motuman sa tanang preemptive evacuation advisories nga ipagula ilabi na sa mga lugar nga delikado sa pagbaha tungod sa padayon nga pag-ulan ug pagsaka sa tubig sa mga sapa.
Sumala ni CDRRMO Head Alfredo Baloran, dako ang papel sa kooperasyon sa katawhan aron malikayan ang kadaot sa panahon sa kalamidad. Iyang gipasabot nga adunay ordinansa nga nagmando sa pagpahigayon sa preemptive evacuation ug dunay silot sa mga motipas niini. “Dili mi gusto nga mapugos pa mig patuman sa balaod, pero kung musupak, mapriso o mamultahan gayud ang malapason,” pasabot pa ni Baloran.
Ilawom sa Ordinansa Blg. 0246-23, gipatuman niadtong 2023, ang Integrated Preemptive Emergency Evacuation System. Ang mga molapas niini posible nga multahan og P5,000 o prisohon sulod sa usa ka buwan depende sa desisyon sa korte. Busa gihangyo sa CDRRMO ang tanan nga magtinabangay ug magpakabana aron masiguro ang kaluwasan sa matag komunidad panahon sa katalagman.
