Narespondehan sa mga personahe sa Bureau of Fire Protection (BFP) Caraga ang usa ka insidente sa pagkamatay sa usa ka mananagat nga nalumos sa dagat daplin sa Barangay Santiago, lungsod sa Caraga, Davao Oriental. Ang tawag alang sa tabang sa retrieval operation nadawat pasado alas-8 sa buntag niadtong, Mayo 7, 2025, gikan sa Municipal Disaster Risk Reduction and Management Office (MDRRMO) sa Caraga.
Gipangalanan ang biktima nga si Joliveen Lampig Sumaliling, 42-anyos, ug residente sa Barangay San Jose sa maong munisipyo. Base sa inisyal nga imbestigasyon, nasangit ang biktima sa iyang sariling pukot samtang nagpanagat, hinungdan nga wala kini makaginhawa ug nalumos.
Nagpahimangno karon ang mga otoridad sa mga mananagat ug residente sa maong lugar nga magbantay sa tanang oras ug likayan ang panagat nga walay kauban, ilabi na kung dili maayo ang kahimtang sa panahon. Gi-awhag sab ang publiko nga motawag dayon sa mga otoridad kung adunay kalit nga emerhensiya aron malikayan ang susamang trahedya.
