Patay ang usa ka lalaki human gitigbas sa iyang silingan nga naglagot human ang iyang kanding nakasulod sa maisan sa suspetsado og gipang-kaon ang mga tanom.
Ang insidente nahitabo alas 6 sa gabii niadtong Huwebes, Abril 24, 2025, sa Sitio Mamacao, Barangay Buhangin, Malita, Davao Occidental.
Giila ang biktima nga si Joven Guban, 30 anyos, residente sa Sitio Udalo, samtang ang suspetsado nailang si Johnny Bacuna, hamtong, ug lumulupyo sa maong lugar.
Sumala sa report sa Malita Municipal Police Station, nasuko si Joven tungod sa kanding nga gitugway sa iyang maisan, hinungdan sa ilang away og miresulta sa usa ka krimen.
Sa pahayag sa pamilya sa biktima, gikan pa namalit og isda si Joven ug pauli na unta sakay sa iyang motor apan giatangan siya sa suspetsado ug kalit nga gitigbas sa makadaghang higayon nga miresulta usab sa iyang hinanaling kamatayon.
Human sa insidente, misulay og dagan ang suspetsado apan misurender kini sa kapulisan pagkasunod adlaw, niadtong Abril 25, 2025. Karon, balhog na sa Malita Municipal Police Station ang maong suspetsado ug mag-atubang og kasong murder.
