Gitinguha sa administrasyon ni Pangulong Ferdinand Marcos Jr. nga makahatag og 1,552 ka mga Patient Transport Vehicles (PTVs) ngadto sa matag local government unit (LGU) sa tibuok nasud, aron masiguro nga adunay kasaligan nga sakyanan ang matag lungsod ug munisipyo alang sa paspas nga pagdala sa mga pasyente padulong sa mga ospital o tambalanan.
Atol sa iyang pagpamulong kagahapon sa Cagayan de Oro City, gipasigarbo sa Pangulo nga adunay 567 na ka mga PTVs ang nahatag sa Philippine Charity Sweepstakes Office (PCSO), samtang 985 pa ka mga yunit ang target nga ipanghatag sa dili pa matapos ang tuig 2025. Kon makompleto na ang distribusyon, gilauman nga ang tanang 1,493 ka mga LGUs sa nasud makadawat og tagsa ka PTV, ug ang uban kanila makadawat og duha ka yunit, depende sa ilahang panginahanglan.
Panawagan pa ni Pangulong Marcos sa mga lokal nga panggamhanan mao ang pag-amping ug pag-atiman sa mga sakyanan aron daghang katawhan ang mapadulngan ug matabangan sa maong serbisyo. Ang maong programa ilawom sa Medical Transport Vehicle Donation Program sa PCSO ug kabahin kini sa ilahang tuyo nga palig-onon ang access sa mga Pilipino sa de-kalidad nga serbisyong medikal, ilabi na sa mga lagyo ug kakuwang sa pasilidad nga mga dapit.
Pinaagi sa maong inisyatiba, gipalapdan sa gobyerno ang kapasidad sa mga LGU sa pagresponde sa mga emerhensya ug pagpadali sa pagdala sa mga pasyente, bisan pa sa ilahang kahimtang o lokasyon sa nasud.
