Na-delay og unom ka oras sa pag-landing sa Shanghai ang usa ka eroplano nga padulong sa China tungod mismo sa piloto niini.
Nasayran nga subay sa report sulod na sa duha ka oras nga naglupad ang eroplano sa United Airlines, apan nadiskubrehan sa piloto nga nakalimtan diay niini ang iyahang passport.
Sumala sa pahayag sa United Airlines, ang United Flight 198 nga gikan sa Los Angeles padulong sa Shanghai napugos nga mo-landing pabalik sa San Francisco International Airport gumikan ang piloto wala nagdala sa iyang passport.
Dugang pa sa airline company, tungod sa maong panghitabo naghimo na sila og lakang aron makambyuhan og bag-ong crew ang ilahang mga pasahero ug mapadayon ang ilahang biyahe padulong sa destinasyon niini niatong gabhiona. Gihatagan usab sila og meal vouchers ug kompensasyon.
Sakay sa maong eroplano ang 257 ka mga pasahero ug 13 ka crew members.
