Giaprobahan sa 20th Davao City Council ang usa ka ordinansa nga nagtugot sa lokal nga gobyerno sa syudad sa pagpatuman og usa ka Memorandum of Agreement (MOA) tali sa LTS Malls, Inc. kon NCCC aron maghatag og libre nga pagsulod sa sine alang sa mga Persons with Disabilities (PWDs).
Ang maong inisyatiba nagasubay sa Ordinance No. 155-23 nga nagahatag og libre nga movie passes alang sa PWDs.
Pinaagi sa maong kasabutan, ang mga PWDs makagamit na og libre nga sine sa giingon nga mall matag Lunes sa unang adlaw sa screening.
Tumong sa maong kalihukan alang sa pagpaayo sa recreational ug cultural nga mga kasinatian sa mga PWDs sa Davao City.
Sumala pa ni Atty. Redendo Martinez, labaw sa Persons with Disabilities Affairs Office (PDAO), nga ang mga mall usab sa downtown area ning dakbayan, andam na usab sumala pa nga muhatag og susama nga serbisyo, diin gibutyag niini nga nagpaabot na lamang sumala pa sa pirma sa mayor aron nga makasugod na kini.
Nagpasalamaton si Martinez sa Lokal nga panggamhanan sa Davao gumikan sa pagpalapad sa serbisyo sa PWD ug ingon man dako usab ang pasalamat niini sa mga Mall nga andam muhatag sa maong serbisyo.
Sa kasamtangan, adunay kapin 23,000 ka PWDs sa Davao City, ug nagdahom nga magpadayon ang pagtaas sa ilang ihap gumikan ang mga tawo nga adunay kanser ug mga rare diseases nahilakip na usab sa kategoriya sa PWDs.
