DAVAO CITY- Giransak sa tulo ka mga tulisan ang Hanna’s Pawnshop nga nahimutang sa Illustre St.ning dakbayan sa Davao pasado alas Nuybi ang takna kaganihang buntag.
Sa gihimong paghinabi sa Bombo Radyo sa mga nakasaksi ilabi na sa gwardia,ang tulo ka mga suspek ang kalit sumala pa nga mideklara og hold-up dayon gipangbuak ang mga salamin gamit ang maso ug gipangkuha ang mga alahas.
Walay nahimo ang usa ka gwardya nga si Cutillas gumikan kalit sumala pa nga gitiunan og armas ug gibunalan sa likod sa iyahang tangkugo nga bahin.
Sa paghinabi usab sa sidewalk vendor nga anaa lamang sa kilid nga bahin sa pawnshop, gikanayon niini nga segundos lamang ang gihimo nga pagkuha sa mga alahas ug gilayon nga misibat ang mga nahisgutan sakay sa motorsiklo ug nagpadagan kini padulong sa San Pedro St. apan pag-abo t sa kanto Quirino Avenue, wala na moandar ang gisakyan nga motrsiklo.
Samtang nagkaduol na ang mirespondeng kapulisan, nag-iyahay na sa pagdagan ang tulo ka mga suspek padulong sa Bangkerohan og gibilin ang motorsiklo.
Sa gipahigayon nga paggukod sa mga otoridad usa sa mga fruit vendor sa Bangkerohan ang nakadakop sa usa sa mga suspek ug giturn-over kini sa kapulisan.
Narekober sa suspek ang mga tag-as nga armas ug ingon man ang mga alahas nga sumala pa nagkantidad og 40-ngadto sa 100 milyon.
Sa karon padayon pa ang gihimong imbistigasyon sa kapulisan ingon man ang nakasibat nga duha ka mga suspetsado.
