Pormal na nga giturn-over sa Davao City Social Welfare and Development Office (CSWDO), pinaagi sa pakigtambayayong sa Department of Social Welfare and Development (DSWD), ang Project Lawa at Binhi sa mga residente sa Barangay Carmen ug Cadalian sa Baguio District.
Kini nga proyekto gisupportahan usab sa Davao City Agriculturist’s Office (CAgrO) ug Bureau of Fisheries and Aquatic Resources (BFAR) diin nahimutang kini sa Macatabo Farm sa Carmen ug nagahatag og sustainable livelihood alang sa 50 ka residente gikan sa women’s association ug men’s support group sa maong lugar.
Ang maong proyekto gilangkoban sa bag-ong gitukod nga fish pond, Tilapia fingerlings gikan sa BFAR, ug mga tanum nga seedlings gikan sa CAgrO.
Sa wala pa gipasa ang proyekto, ang mga benepisyaryo nakadawat na og capability-building training aron masiguro ang kalampusan ug pagpadayon niini.
Gipasabot ni CSWDO Officer-in-Charge Gilda Salvaña nga ang maong programa nagsiguro nga ang mga serbisyo magamit sa tanan nga andam molambigit niini ug dili lamang sa usa ka barangay.
Gihatag ni Salvaña ang kasiguruhan sa komunidad nga ang Gobyerno sa Siyudad sa Davao magpadayon sa pagsuporta sa ilang mga paningkamot ug magtabang aron malampasan ang mga kalisdanan.
Gani, nagpasalamaton sa gobyerno si Andy Cabantao, usa sa mga benepisyaryo niini, ug nagsaad nga magtinabangay ang grupo aron masiguro ang kalampusan sa proyekto.
Ang Lokal nga panggamhanan sa Davao nagpadayon sumala pa sa pagpatuman sa mga programa ug serbisyo aron sa pagtubo ug kalamboan sa tanan nga Dabawenyo.
