Gipalig-on sa Davao City Police Office (DCPO) ang ilang rescue operations sa mga menor de edad nga naglatagaw sa mga pampubliko nga lugar sa kasamtangan sa curfew hours aron malikayan ang pagbalik sa bag-ong mga insidente nga naglambigit sa mga kabatan-onan.
Sumala pa ni PCpt. Hazel Caballero-Tuazon, ang tigpamaba sa DCPO, nga gikan sa Pebrero 9 hangtod 15, adunay 173 ka menor de edad ang ilang naluwas nga naglatagaw sa mga kadalanan ug ubang pampubliko nga lugar gumikan nakalapas sa Curfew Ordinance ning dakbayan.
Sumala pa sa opisyal, nga dugay na nga ginapatuman sa Davao City ang Curfew Ordinance nga nagbabag sa mga menor de edad nga mugawas gikan alas 10 sa gabii hangtod alas 5 sa buntag, gawas kung adunay kini kuyog nga ilang mga ginikanan o guardian.
Nanawagan usab si Tuazon sa mga ginikanan nga siguruhon nga ang ilang mga anak anaa sa balay sa kasamtangan sa curfew hours ug dili lamang magsalig sa kapulisan alang sa ilang kaluwasan.
Dugang pa niini, nga ang mga kabataan nga walay klarong pagdumala posible nga mahimong biktima o mangbiktima sa uban.
Padayon nga gipasidaan sa DCPO ang mga Dabawenyo nga mosunod sa mga ordinansa sa syudad aron mapadayon ang kalinaw, kahapsay ug masiguro usab ang kaluwasan sa tanan.
