Opisyal na nga gipagawas sa City Tourism Operations Office (CTOO) ang mga kalihukan alang sa 88th Araw ng Dabaw nga ipahigayon gikan sa Marso 1 hangtud Marso 16, 2025.
Pagasugdan ang selebrasyon og Misa Pasasalamat sa San Pedro Cathedral sa Marso 1, nga sundan usab og Pasiugdang Pagsaulog sa Rizal Park pagkagabie sa susama nga adlaw.
Ang mga nag-una nga kalihokan sa selebrasyon naglakip sa Araw ng Dabaw Fair sa Magsaysay Park gikan Marso 1-31, ang RondalSayaw sa Araw ng Dabaw elimination round sa Marso 2, nga ang grand finals ipahigayon usab sa Marso 8 sa Rizal Park, ug ang Kundiman at Harana sa Araw ng Dabaw nga ipahigayon sa Marso 2, 9, 10, 11, ug 15 sa atubangan sa City Hall.
Samtang, ang Kalingawan sa Distrito ipahigayon usab sa nagkadaiyang barangay gikan Marso 3 hangtod 8.
Ang Mutya ng Dabaw preliminaries magahiusa sa Marso 9, samtang, ang grand coronation magapadayon sa Marso 15 sa USEP Gymnasium.
Ipahigayon usab ang Mercado Dabawenyo gikan Marso 12-16 ug ang uban pa nga mga kalihokan naglakip sa Conferment of Datu Bago Awards sa Marso 7, Araw ng mga Empleyado sa Marso 12, ug Pasidungog: Garbo sa Dabaw, sa Marso 13.
Sa katapusan nga adlaw sa Marso 16, humanon ang selebrasyon pinaagi sa Parada Dabawenyo ug Hugyaw Dabaw.
Gina-awhag usab ang Dabawenyo sa City Government of Davao ug City Tourism Operations Office (CTOO) nga sundon ang ilang Official Facebook Page alang usab sa dugang nga detalye ug mga update kabahin sa maong kalihokan.
