Padayon nga ginatutukan sa Department of Education ang pagpakgang sa posibleng pagbalik sa presensya sa New People’s Army sa matag tulunghaan.
Sumala pa ni Jenielito Atillo, ang tigpamaba sa DepEd XI, nga subling siguruhon sa buhatan ang pakigbisog niini batok sa mga daotan nga organisasyon ug institusyon nga laraw mudaot sa pangutok sa magtutungha.
Susama sa maong lakang mao na usab ang pagpasarado sa departamento ngadto sa 55 ka mga Salugpungan Schools kaniadtong 2019, diin gikanayon niini nga miagi kini sa due process.
Samtang, sumala pa sa opisyal, nga ang mga polisiya usab susama sa Child Protection policy ug guidance program hugot nga ginaimplementar na ngadto sa mga tulunghaan.
Gipaklaro niini, nga kung mamatikdan, ang mga natigayong kaso sa pagpangulata sa managlahing magtutungha sa nakalabayng semana dinhi sa dakbayan usa lamang sa nagapamatuod nga epektibo ang mga polisiya sulod sa tulunghaan.
Ang maong mga polisiya ug giya usab sa mga magtutudlo ang nagasiguro sa kaayohan sa mga magtutungha samtang anaa pa sa institusyon.
Gisuguro usab ni Atillo ang pakigtambayayong sa DepEd ngadto sa nagkadaiyang mga hingtungdan nga buhatan susama sa Davao City Police Office ilabi na sa mga grabe ng kaso.
Sa pagka karon, nagapadayon gihapon ang kalihukan sa buhatan batok sa maong mga kaso sa bullying kalakip na usab ang pagpangrecruit sa mga teroristang grupo.
