Nailhan na sa mga otoridad ang mga suspek sa pagpamusil patay sa usa ka LGBTQ member sa Daproza Avenue, General Santos City.
Sa nahimong interview sa mga kaubanan sa Bombo Radyo kang PCPT. Cyrus Vince Arro, hepe sa Pendatun Police Station nagapadayon ang hot-pursuit operation nga ginahimo sa kapulisan sa mga suspetsado.
Gibutyag niini nga giandam na usab ang kasong murder nga ipasaka batok sa mga suspek nga migamit og caliber 38 og caliber 45 pistol sa pagpamusil.
Nahitabo ang insidente sa panag-iyahang salon sa biktima samtang kini naglingkod kauban ang pipila sa iyang mga empleyado. Adunay usa ka lalaki ang miabot og namusil sa sulod sa salon.
Pipila kahigayon nga misulod-gawas ang suspetsado og namusil sa sulod sa salon kung asa misukol ang biktima og ang empleyado niini pinaagi sa paglabay og mga butang apan nakorner sa suspetsado ang biktima.
Giila ang biktima nga si Renante ‘Ren’ Tampus, 35 anyos, usa ka salon owner.
Dugang ni PCPT. Arro, sa wala pa nahitabo ang pagpamusil, pipila ka higayon matod pa nga nakadawat ug pagpangbahad ang biktima gikan matod pa sa mga kasosyo niini, wala na gihisgot pa kung unsa na negosyo kini.
