Gihatagan sa Department of Transportation o DOTr og usa ka bulan ang Land Transportation Franchising and Regulatory Board o LTFRB aron magpagawas og rekomendasyon sa mga pending nga petisyon alang sa dugang pamasahe, nunot sa padayong pagsaka sa presyo sa lana.
Sumala ni Transportation Secretary Giovanni Lopez, kinahanglan nga makapagawas na og desisyon ang LTFRB sa Oktubre, samtang ipadayon ang mga hearing sa mga petisyon sa fare increase.
Matud pa ni Lopez, gikinahanglan ang hustong balanse tali sa panginahanglan sa transport sector ug sa kapakanan sa mga commuter, ilabina kay ang pagtaas sa pamasahe mahimong makaapekto usab sa inflation.
Samtang, gitun-an sa gobyerno ang ubang pamaagi aron matabangan ang mga transport group sa epekto sa taas nga presyo sa fuel, lakip ang posibilidad sa pagpalapad sa fuel assistance ngadto sa mas daghang PUV operators ug tricycle.
Sa pagkakaron, anaa sa ₱12 kada litro ang fuel discount alang sa mga jeepney ug UV Express units, nga mahimong moabot sa ₱1,800 ang matipid kada semana alang sa mga kwalipikadong operator.
Nagpadayon ang LTFRB sa pagmonitor ug pagdungog sa mga petisyon samtang ginatan-aw sa gobyerno ang mga lakang nga makatabang sa transport sector ug dili usab makapabug-at pag-ayo sa mga commuter.
