Mipaspas ug 2.5% ang inflation rate sa nasud niadtong milabay nga bulan, matod pa sa report sa Philippine Statistics Authority (PSA).
Gipahayag pa sa PSA nga resulta kini sa pagsaka sa presyo sa baboy ug karne sa mga merkado, gumikan sa pagkuyanap sa African Swine Fever (ASF) niadtong nakalabayng mga bulan ug sa kapaspas sa demand sa suplay gumikan sa holiday season.
Dugang pa ni National Statistician ug PSA Undersecretary Claire Dennis Mapa, nakadugang usab sa pagsaka sa inflation ang pagtaas sa transport cost sa mga nag-unang panginahanglanon gumikan sa pagsaka sa produktong petrolyo sa mga nakalabayng semana.
Apan bisan paman nga misaka ang kinatibuk-ang inflation rate, mihinay usab ang rice inflation gikan 9.6% niadtong bulan sa Oktobre ngadto na sa 5.1% sa bulan sa Nobyembre.
Dakong tabang sa pagpahinay sa rice inflation ang mga nagkadaiyang programa nga gilusad sa gobyerno susama sa Rice for All program, matod pa sa National Economic and Development Authority o NEDA.
