Sa panahon karun og gutumon ang usa ka tawo, mangita gayud kana og pamaagi aron makakaon, hilabi na kadtong mga tawo nga adunahan, diin dali kini makapalit og bisan unsang matang sa pagkaon nga buot nilang kaunon.
Ug alang usab sa mga pobre og ga tipid sa ilahang budget, mantinir na lamang kini og bahaw nga dukot, ipares sa sinangag nga kape, aron sa ingun nga makunhoran ang kakutoy sa tiyan.
Apan mga kabombo kabalo ba mo? adunay pinasahi ug life hack ang usa ka babaye nga nagpuyo sa China, diin aron sumala pa nga makatipid sa higayong gutomun kini, inay nga bugas ang paliton, feeds na man hinuon sa baboy ang gipalit.
Giila ang maong livestreamer nga si Kong Yufeng, diin mas nailado ang pangalan niini pinaagi sa pagtawag kaniya og King Kong Like, human sa pagdawat niini nga maong challenge.
Sumala pa ni Kingkong nga nagbuhat matud pa kini siya og research aron mangita og asa ang angay niining pilion nga kaunon nga makaganar kini sa presyo diin gikanayon niini nga mahilakip usab sa iyahang best option aron makatipid sa iyahang pang usa ka semanang kunsomo.
Dugang pa niini nga mikabat lamang matud pa ang iyahang nagasto og 100-Yuan kon katugbang sa 813 pesos, diin usa ka sakong feeds na sumala pa kana sa baboy.
Gawas pa usab nga nakaganar na kini sa presyo, masustansya pa gayud kuno ang maong feeds gumikan ang baboy gani mitambok og kinaon og feeds, siya na ba kaha? Dugang pa ni Yufeng, dili siya angay mabalaka sa gikaon nga feeds, gumikan aduna kini mga sagol – sama sa soybeans, peanuts, sesame, corn, ug added vitamins nga sumala pa haom usab sa mahimong kaonon sa tawo.
Daghan ang wala nakasabot sa trip sa maong babae, apan adunay nagkanayon nga hangtod nga dili kini makahilo, mamahimo kini niyang kaunon hangtod sa kahangturan.
