Mihinay ang inflation rate kon paglihok sa presyo sa mga palaliton ug serbisyo sa nasud niadtong Setyembre 2024 sumala sa Philippine Statistics Authority (PSA).
Sa report ni PSA Chief ug National Statistician Claire Dennis Mapa, mikunhod sa 1.9% ang inflation alang sa bulan sa Setyembre gikan sa 3.3% nga inflation niadtong Agosto 2024.
Kini sab ang mas-ubos kung itandi sa 6.1% inflation nga natala niadtong Setyembre 2023.
Sa kinatibuk-an, nakatala ug average inflation ang nasud nga 3.4% gikan sa bulan sa Enero hangtod sa Septyembre 2024.
Kini ang sulod pa gihapon sa target range sa kagamhanan alang sa kinatibuk-an nga 2024 nga 2%-4%.
Pagpasabot sa PSA nga ang nag-unang hinungdan sa paghinay sa lebel sa inflation ang mas luya nga paglihok sa presyo sa ‘food and non-alcoholic beverages’ sa lebel nga 1.4% nga adunay 69.1% share kon dugang sa pag-ubos sa kinatibuk-an nga inflation sa atong nasud.
Ang nag-unang hinungdan sa pag-ubos sa inflation sa ‘food and non-alcoholic beverages’ mao ang mas hinay nga pagsaka sa presyo sa ‘cereal products’ nga adunay 4.9% inflation partikular ang bugas, gulay, tubers o carrots, celery, kamote, patatas ug uban nga adunay -15.8% inflation sama sa kamatis.
Mihinay sab sumala pa ang inflation sa transportasyon partikular sa presyo sa gasolina ug diesel lakip na sa LPG ug singil sa kuryente.
Dugang pa ni Mapa sa National Capital Region (NCR) adunay paghinay sa 1.7% nga inflation niadtong Septyembre ingon man sa gawas sa Metro Manila nga anaa sa 2%.
