Andam na ang House prosecution nga susihon ang 24 ka posibleng testigo sa depensa ni Vice President Sara Duterte sa pagpadayon sa impeachment trial karong Lunes, Nobyembre 9, 2026.
Matod ni Bicol Saro Party-list o co-lead public prosecutor and spokesperson for the House prosecution panel Rep. Terry Ridon, supakon nila ang mga testigo kansang testimonya walay direktang kalabotan sa alegasyon sa unexpalined wealth batok sa Bise Presidente.
Gikuwestiyon usab ni Ridon kung makatubag ba sa mga alegasyon ang mga opisyal sa bangko, representante sa mga korporasyon, ug kawani sa lokal nga panggamhanan nga anaa sa listahan sa mga testigo.
Samtang, mipasalig si House Prosecution Legal Spokesperson Atty. Benjamin “Jay” Tolosa Jr. nga dili nila tugotan ang mga lakang nga makapalangan sa pagtaral. Abli usab ang prosecution sa pakigsabot kabahin sa mga ebidensiyang dili na kinahanglang paglalisan aron mapadali ang proseso.
Gipasidan-an ni Tolosa nga mahimong malangan ang trial kon magpresentar ang depensa og ebidensiya kabahin sa tulo ka impeachment article nga gibawi na o gamiton ang tibuok 30 ka adlaw sa ilang presentasyon.
Kahinumdoman nga Article II na lamang, nga may kalabotan sa alegasyon sa dili maipatin-aw nga bahandi, ang nahibilin human bawion sa House prosecution ang mga artikulo kabahin sa confidential funds, grave threats ug bribery.
Una nang gidawat sa Senate impeachment court ang mga dokumentong pinansyal sa prosecution nga naglangkob sa alegasyon nga mokabat sa ₱817.87 milyon nga unexplained wealth gikan 2022 hangtod 2025.
