Gikabutyag nga dili lamang usa apan duha ka house and lot sa Tagaytay City ang gihatag sa Philippine Olympic Committee (POC) kang Olympic Games double-gold medalist Carlos Yulo.
Gipahayag ni POC president Abraham ‘Bambol’ Tolentino nga ang regalo sa Pinoy star gymnast ang alang sa makasaysayan niining duha ka mga bulawang medalya nga nakuha sa nakalabayng 2024 Olympics sa Paris, France.
Ang duha ka-andanang balay nga adunay gidak-ong 500 square meters ang mubalor ug P15 milyon.
Gumikan niini, milagpas na sa P100 milyon ang nadawat nga mga cash incentives ug cash rewards sa 24-anyos nga si Yulo, gawas pa sa usa ka condo unit.
Dili lamang si Yulo ang gihatagan ni Tolentino ug house and lot gumikan kay lakip na usab niini sila si bronze medalists Nesthy Petecio ug Aira Villegas sa women’ boxing.
Gihatagan sa POC Chief sila si Petecio ug Villegas ug bungalow sa managlahing 200-square meter lots.
Samtang kini na ang ikaduhang pinuy-anan ni Petecio sa Tagaytay City homan nga gihatagan usab ni Tolentino ug house and lot sukad nga nakakuha kini ug silver medal sa Tokyo 2020 Olympics.
Tag-usa ka house and lot usab ang nadawat nila ni Tokyo Games silver medalist Carlos Paalam ug bronze medalist Eumir Felix Marcial gikan sa POC head sa usa ka compound nga gitawag ug Olympic Village sa Tagaytay City.
Dugang pa sa POC president nga angayan lamang si Yulo, Petecio ug Villegas nga mudawat ug mga regalo.
