DAVAO CITY- Wala na madala pa sa ospital human nakabsan sa kinabuhi ang usa ka lalaki human nga mibangga kini sa usa ka Van sa Baranggay Sirawan, Toril ning dakbayan sa Davao kagahapon sa buntag.
Subay sa report sa kapulisan giila ang biktima nga si Jovin Campomanes Montalvo, 25-anyos, ulitawo nga residente sa Purok 2, Labon, Sulop, Davao Del Sur.
Samtang ang usa ka Van, gimaneho sa usa ka Hajeb Naguib Dizo, 39 -anyos, minyu ug residente sa 10 ninoy Aquino Avenue, San Dionisio, Parañaque City.
Sa inisyal nga imbistigasyon sa kapulisan, pasado alas singko ang takna kaganihang buntag nahitabo ang disgrasya sa Sirawan Davao Cotabato Road Maharlika, National highway, ning dakbayan sa Davao.
Sumala pa sa kapulisan, ang biktima nga nagmaneho sa iyahang motorsiklo nga gikan sa Binugao ug padulong kini sa Toril, samtang ang Van anaa kini sa pikas nga linya.
Apan,sumala pa sa mga nakakita, kalit lamang mibangga ang motorsiklo nga gimaneho sa biktima sa wala nga bahin sa sakyanan sa Van.
Tungod sa nahitabo, misarasay ang motor sa biktima, samtang nalabay kini sa semento nga maoy hinungdan sa iyahang pagkaangol.
Dali nga girespondehan sa mga otoridad sa Medics gikan sa Central 911 ang bahin sa nahitabuan ug sa paghiling sa otoridad wala na’y pulso ang biktima.
Sa karon gikustudiya na sa kapulisan ang drayber sa Van, ingon man ang nadamyos nga mga nalambigit nga sakyanan.
