TAGUM CITY- Gipangdala sa ospital ang magti-ayon nga sakay sa usa ka Bao-Bao nga nabanggaan sa truck kagainang ala-una ang takna sa hapon sa Magdum national Highway, dakbayan sa Tagum.
Nakahiagom ug mga bun-og sa kalawasan ang mga biktima tungod sa pagka-ipit sa nalumping nga Bao-Bao.Sumala pa sa mga nakakita sa maong panghitabo, nga nagsubay sa inner lane ang gisakyan sa mga biktima apan nasangit kini sa usa ka Pick-up nga anaa sa fast lane.
Gumikan sa pagkasangit niini napadulong kini sa outerlane nga gisubay sa Wing Van nga maoy hinungdan nga nabanggaan ang mga biktima.
Tungod sa kakusog sa pagkabangga, nalumping ang Bao-Bao sa atubangan nga bahin ug naipit ang mga biktima ilabi na ang drayber nga gigamitan pa kini sa mga rescuer ug cutter aron mahaw-as ang mga magti-ayon.
Samtang ang Pick-up nga unang nakasangit sa gisakyan sa mga biktima ang misibat human sa maong panghitabo.
Sa karon nagpadayon pa ang gihimong imbistigasyon sa kapulisan kabahin sa maong panghitabo.
Samtang ginasuta pa usab sa mga otoridad ang mga pangalan sa biktima ingon man ang ilahang kahimtang karon human nga gidala sa ospital.
