Gihisgutan sa Department of Budget and Management (DBM) ang napulo ka mga nag-unang ahensya sa kagamhanan nga nadungagan ang ilahang pondo sa Fiscal Year 2025.
Gipahayag ni DBM secretary Amenah “Mina” Pangandaman ang top priority nga nahatagan ug dakong alokasyon mao ang Department of Education (DepEd) nga anaa sa P977.6 bilyon.
Samtang alang usab sa development ug maintenance sa inprastraktura nga mapadali ang paglambo sa ekonomiya ug mapatarong ang pagkonekta, makadawat usab ug dakong alokasyon ang Departmemnt of Public Works and Highways (DPWH) (P900-B).
Gigahinan usab ug mukabat sa P297.6 bilyon ang Department of Health (DOH) aron mapadayon ang pagpatuman sa Universal Health Care Act ug maseguro nga ma-access ug abot-kayang serbisyo sa panglawas, pagpakusog sa kalig-on sa nasud batok sa mga umaabot nga krisis sa panglawas.
Samtang ang Department of Interior and Government (DILG) ang makadawat usab ug mukabat sa P278.4 bilyon subay sa pagtutok sa administrasyon sa pagpadayong pagpalambo nga makaabot bisan sa suok nga mga lugar.
Makadawat ang National Defense ug mukabat sa P256.1 bilyon aron himuong bag-o ang mga katakus sa pagdepensa ug maseguro ang kaluwasan ug soberenya sa nasud.
Ang Department of Social Welfare and Development (DSWD), ang makadawat usab ug P230.1 bilyon, Department of Agriculture (DA) P211.3 bilyon, Department of Transportation (DOTr) P180.9 bilyon, Judiciary P63.6 bilyon, Department of Justice (DOJ) P40.6 bilyon.
Ang proposed 2025 national budget ang na-turn over na sa kongreso.
