DAVAO CITY- Nagmuntar na og tulo ka Smart Traffic Enforcement System (STES) ang City Transport Traffic Management Office sa Diversion Road, ning dakbayan.
Ang maong proyekto ang kabahin sa Public-Public-Partnership (PPP) nga dakong tabang sa pagmonitor sa kadalanan.
Sumala pa ni CTTMO Chief Dionisio Abude, preperasyon kini sa touchless apprehension kon diin mapasalig gihapon nila ang pagsunod sa mga driver sa balaod trapiko bisan paman nga walay traffic enforcer sa maong dapit diin sagad nagahimo og citation ticket sa nagmalapason nga driver.
Ang maong ekipo ang mo-detect sa kinsa mang wala nagsuot og seatbelt, nisobra sa speed limit, naggamit og selpon atol sa pagmaneho, ug uban pang kalapasan sa dalan.
Pagpaklaro usab sa opisyal nga pribadong kompanya ang nihatag og budget sa maong ekipo ug walay gasto ang syudad sa Davao.
Ning kasamtangan, gina-monitor na sa mga hingtungdan ahensya ang pagpatuman niini uban sa plano nga pagmuntar pa og dugang niini isip dakong tabang sa pagseguro sa kaluwasan sa tanang nagalawig sa kadalanan.
