Boluntaryong nagpagawas og waiver si Comelec Chairman George Erwin Garcia aron pasagdan ang mga imbestigador nga sutaon ang iyahang bank records.
Ang maong lakang sa Comelec Chairman ang human sa pagbutyag ni SAGIP Partylist Representative Rodante Marcoleta nga matud pa dili mo-ubos sa P1 bilyon ang gibalhin gikan sa mga bangko, lakip na ang mga nakabase sa South Korea, padulong sa 49 ka offshore accounts nga gikaingon nalambigit sa usa ka opisyal s Comelec.
Matud pa ni Garcia nga gibuhat niini ang pag-waive sa bank secrecy aron dili mahugawan ang reputasyon sa COMELEC ug sa katapusan mapamatud-an usab sa mga kritiko nga limpyo ang iyahang rekord ug wala kini siyang ginatago nga dili maayo.
Gawas niini, gisumite usab ni Garcia ngadto sa National Bureau of Investigation (NBI) ang 49 ka mga bank account nga gipagawas ni Marcoleta.
Buot usab matud pa nga mahibal-an sa Comelec Chairman kon asa gikan ang maong mga bank details ug kon tinuod bang ginagamit gayud kini.
Nagalaum usab kini siya nga mabutyag na ang tanang kamatuuran aron mugawas usab og kinsa ba ang nagpaluyo sa nagakatag nga fake news o misinformation batok sa COMELEC.
