Gidala sa Region XI ang duha ka dagkong kadaugan sa 53rd National Music Competitions for Young Artists o NAMCYA Padayaw 2026, human nag-una ang duha ka grupo gikan sa Davao Region sa ilang tagsa-tagsa ka kategoriya.
Nakuha sa Davao City National High School SPA Centennial Choir ang first prize sa Youth Choir–Mixed Voices, lakip ang Best Interpretation of the Contest Piece. Samtang midaog usab og first prize sa Children’s Rondalla ang Sto. Tomas National High School–Special Program in the Arts Sining Cuerdas Rondalla.
Sa laing bahin, nakakuha og second prize sa Youth Choir–Mixed Voices ang Panabo City National High School Mystiki Chorodi, samtang third prize ang Polomolok National High School Chorale sa Region XII. Gihatagan usab og honorable mention ang Salinlahi Serenata Singers sa Region IV-A.
Matud sa DepEd Region XI, resulta kini sa hiniusang paningkamot sa mga eskwelahan gikan sa Schools Division of Davao del Norte ug sa tibuok rehiyon, nga nakapabalik sa kampeonato sa Region XI sa maong kompetisyon.
Ang NAMCYA Padayaw usa ka nasudnong kompetisyon nga nagtumong sa pagpalambo sa talento sa mga batan-ong Pilipino sa musika ug pagpreserbar sa kulturang musikal sa nasud.













