DAVAO REGION- Patay on the spot ang usa ka waiter human nga gipusil sulod sa usa ka resto bar sa dakbayan sa Tagum.
Subay sa report sa kapulisan, nahitabo ang pagpamusil kaganihang kaadlawon sulod sa usa ka resto bar nga nahimutang sa Purok Galingan, Ferrido St. , Brgy. Mankilam, Tagum City.
Ang biktima giila nga si alias Joel 23-anyos nga residente sa Barangay San Miguel, Tagum City, San Isidro Davao Del Norte.
Sa imbistigasyon sa kapulisan, nakig-inom ang biktima sa iyahang mga kaubanan samtang nagpaabot sila ug kostumer, apan kalit na lamang nga gipusil ang biktima sa nagkadaiyang bahin sa iyahang kalawasan nga miresulta sa iyahang hinanaling kamatayon.
Sa crime scene narekober sa mga otoridad ang lima ka mga basyo sa bala ug tulo ka mga balinis nga gituohan nga iya kini sa .45 nga pistola.
Sa pagkakaron ang nasampit nga biktima ang giasikaso na sa iyahang kabanay aron sa paghiluna sa patay nga lawas niini.
Blangko pa sab ang kapulisan sa motibo sa krimen ingon man ang suspetsadong namusil.
