DAVAO REGION- Gidagsa ang gipahigayon nga Kalayaan Job Fair alang sa mga nangita ug trabaho karong adlawa nga gipahigayon sa Atrium sa Gaisano mall of Davao, JP Laurel Avenue ning dakbayan sa Davao.
Gatusan ka mga jobseekers ang nanimpalad nga makakita ug trabaho karong panahuna samtang nagpadayon kini sa maong venue.
Usa sa mga ni-avail sa gitanyag nga trabaho mao si “Janesa” nga gikan sa Matina Aplaya nga bag-o lang nga nakagradwar sa kolehiyo diin buot niini nga maaplayan ang BPO industry.
Nasayran nga adunay dul-an singko mil ka mga bakanteng trabaho dinhi sa rehiyon ang itanyag sa DOLE kung diin adunay kapin sa dos mil ang dinhi sa lokalidad nga trabaho ug usa niana ang BPO.
Samtang halos dos mil sab ang overseas nga karon ang bakanteng trabaho nga in-demand ang staff nurse, production ug sa manufacturing.
Subay sa gipaguwa nga datos sa DOLE 11 as of 12 noon, adunay kinsi ka mga aplikante ang na-Hired on the spot, samtang kwarentay siete ang near hired on the spot sa kinatibuk-an nga 954 ka mga nangaplay ug trabaho.
Naglaom karon ang pamunuan sa DOLE 11 nga molabaw pa ang gidaghanon karon sa mga madawat sa trabaho ingon man ang ma-‘hired on the spot’.
Samtang gawas sa Kalayaan Job Fair, adunay gipahigayon sab nga Kadiwa Fair nga anaa sa lower Ground Floor lakip ang One-Stop-Shop Center nga anaa sa ikalima nga andana sa nasampit nga mall diin nilungtad kini hangtod alas singko sa hapon.
