DAVAO CITY – Andam ang Police Regional Office 11 nga moatubang sa bisan unsang imbestigasyon o imbitasyon gikan sa local government unit bahin sa pag-relieve sa 35 ka personnel gikan sa Davao City Police Office (DCPO).
Kini human gipaambit ni Davao City Vice Mayor Melchor Quitain nga ilang imbitahon ang mga representante sa PRO-11 ug ang regional office sa Department of Interior and Local Government 11 aron tukion ang administrative relief sa 35 ka mga pulis sa DCPO.
Nunot kini sa pagpasar og resolusyon sa City Council human gikondena ang pagrelibo sa 35 ka mga opisyal sa DCPO, nga nagpadayag sa “strong support” sa konseho sa dakbayan sa mga opisyal nga pamahayag nga giluwatan ni Mayor Sebastian “Baste” Duterte.
Gikanayon sa PRO-11 nga wala pa sila makadawat og imbitasyon gikan sa LGU ug kanunay sila nga abli alang sa imbestigasyon.
Sa pikas bahin, gipasalig sa bag-ong hepe sa DCPO nga si Col. Rolindo Suguilon nga magpabilin gihapon ang gisugdang misyon sa kapulisan ug walay kabag-uhang kon reshuffling nga mahitabo sa mga personahe ilawom sa pagpangatundanan niini.
Gawas niana, gipahinumduman ni Suguilon ang mga kaubanang pulis nga dili dapat mataha sa pagpatuman og balaod gumikan sa pagsunod nila sa mga standard operating procedures sa matag operasyon nga ilang ginalusad.
