DAVAO CITY – Gikabutyag nga anaa sa kwarenta ka mga ka mga pulis, lakip ang pito ka station commander, ang girelibohan sa ilang mga katungdanan ug gi-reassign sa Regional Personnel Holding and Accounting Section sa Police Regional Office 11 sugod Biyernes sa gabii, Mayo 24.
Nasayran nga gihimo kini nga lakang dungan sa pag-abot sa duha ka batalyon sa mga pulis gikan sa Special Action Forces (SAF) sa Regional Office bandang alas-9:45 kagabii.
Nahilakip sa gipanaog sa pwesto ang ang tigpamaba sa PRO XI nga si Police Major Catherine dela Rey.
Subay sa special order nga gipagula ni Police Brigadier General Aligre Martinez, gimandoan sa pagrelieve sa ilang mga katungdanan ang ilahang pwesto isip station commander sila: Police Lieutenant Colonel Ronald L. Lao, Police Major Rosario T. Aguilar, Police Major Jimmy D. Evangelista, Police Captain Medardo B. Baleros, PCapt Ronnei G. Batingal, PCapt Henry G. Calvo, PCapt Marlon M. Donquilab, ug PCapt Jefferson G. Escasinas.
Sa pikas bahin, nabutang isip OIC station commanders ang mga pulis nha sila PMaj Manuel Christian Salgado sa Ecoland Police Station; PCapt Ferdinand B. Sonza sa Catigan-Eden Police Station; PCapt Julius A. Edpalina sa Tugbok Police Station; PCapt Francisco A. Catabas sa Toril Police Station; PCapt Ronaldo C. Henson sa Talomo Police Station; PCapt Rozalito L. Clapiz sa Sta. Ana Police Station ug si PMaj Bernie B.Suaga isip hepe sa Davao City Drug Enforcement Unit.
Dugang pa, gipanaog una usab sa pwesto ang anaa sa 29 ka mga pulis nga nalambigit sa pagkamatay sa pito ka gidudahang mga drug pusher atol sa sunod-sunod nga mga anti-drug buy busy operations gikan Marso 23 hangtod 26 ning tuiga.
Kahinumduman nga niadtong Huwebes, Mayo 23, dihang girelibohan sa iyang puwesto si Davao City Police Office Director Richard Bad-ang, ug si Police Colonel Rolindo Saguilon maoy gitudlo nga OIC City Police Director.
Girelibohan ang kapulisan sa ilang puwesto nga girekomendar sa Regional Internal Affairs Service (RIAS) aron mahatagan og dalan ang imbestigasyon sa pito ka gidudahang drug pushers nga napatay sa buy-bust operation nunot sa pagbutang ni Bad-ang isip bag-ong DCPO director.
via || Bombo LJF
