DAVAO DE ORO – Makapanimbawot og balahibo ang nahitabong sunod-sunod nga pagkakaplag sa upat ka mga patayng lawas sa managlahing bahin sa probinsya sa Davao de Oro, niadtong Lunes, Mayo 13.
Unang naplagan bandang alas-6:30 sa buntag ang usa ka patayng lawas sa Purok 1, Bitoon, Barangay Tagdangua sa Pantukan. Subay sa imbestigasyon, usa kini ka lalaki nga dunay tattoo, naka-itom nga tshirt ug itom nga shorts. Giila ang maong lalaki nga usa ka Rey Quidato, 44 anyos.
Narekober gikan sa crime scene ang unom ka basyo sa .56mm nga pusil ug duha ka basyo sa kalibre. 45 nga pistola.
Sunod nga nakit-an bandang alas-9:47 sa buntag ang duha ka patayng lawas sa kadalananan sa Prk. 1 Barangay Panibasan sa Maco. Giila ang mga biktima nga sila Joseph Mifania Cosal, 40 anyos, usa ka chainsaw operator nga nagpuyo sa Purok 5 San Antonio, Mabini; ug Aldrin Catubay Dagsangan, 37 anyos nga minero ug residente sa Purok 3, Barangay Napnapan, sa Pantukan.
Nasayran nga samdan ang duha ka biktima ug narekober sab sa gipanghitaboan ang lima ka basyo sa kalibre. 45 ug duha ka basyo sa kalibre 5.56 nga armas.
Samtang pagkahapon, dunay laing patayng lawas ang naplagan sa Barangay Tagdangua sa Pantukan, apan nagpadayon pa ang Pantukan Municipal Police Station sa pag-ila sa maong biktima.
Ning kasamtangan, gipanubayan na sa mga Davao de Oro Police Provincial Office ang managlahing insidente.
via || Bombo LJF
