DAVAO CITY – Gitugyan na sa kampo ni Kingdom of Jesus Christ leader nga si Pastor Apollo Quiboloy ang pipila ka armas ngadto sa kapolisan sa Davao Region kagahapon, Mayo 8.
Subay sa kumpirmasyon sa Police Regional Office 11, gibutyag niini nga mitahan sa iyang lima ka armas, usa ka Colt Rifle, duha ka Beret Pistol, ug duha ka Metrillo Pistols ang deputy ni Pastor Quiboloy nga si Marlon Acobo.
Kini human nga miduso sa License Revocation and Restoration Board ang mga personahe sa PRO 11, Area Police Command – Eastern Mindanao ug Regional Civil Security Unit 11 gikan sa Firearms and Explosives Office (FEO) niadtong milabayng Mayo 2, 2024 sa Kingdom Compound, Sasa, ning dakbayan.
Giingong gibutyag usab ni Acobo nga nabaligya na usab ang laing 14 ka mga armas nga narehistro kang Quiboloy diin gitunol usab niya ang mga katugbang niini nga dokumento. Human sa maong operasyon, nagpagawas og pamahayag ang kampo ni Quiboloy pinaagi sa legal counsel niini nga si Atty. Israelito Torreon.
Sumala sa kampo, nagpadala sila og papeles ngadto sa PNP Firearms Unit nga nagpamatuod nga 14 sa 19 sa mga armas nga daan nang nakapangalan sa iyaha kaniadto ang mahimong validly disposed o nakapangalan na sa ubang tawo.
Sumala pa nga gipili ni Quiboloy ang pagtugyan sa mga armas bisan pa sa tanang legal reservations sa pag-surrender niini sa mga kapulisan ug bisan pa nga nisang-at og Motion for Reconsideration gikan sa Order ni PNP Chief Rommel Marbil aron mawagtang ang mga huhungihong nga usa siya ka armed and dangerous ug dunay private army.
