DAVAO CITY – Tingkagol sa bilangguan ang usa ka lalaking pasahero nga gikatahong nagbuhi og “bomb joke” sulod sa Davao International Airport niadtong Mayo 3.
Sumala sa taho sa PNP Aviation Security Group, nasayran nga paingon Singapore ang maong pasahero.
Girespondehan sa Davao International Airport Police Station ang taho sa customer service agents sa Philippine Airport Ground Support Solutions, Inc. mahitungod sa maong bomb joke nga gibuhat sa mismong check-in counter sa airport.
Sa pagpangutana sa mga customer service agents sa suspek, mitubag kini og “Wala ni mabuak diri Ma’am, bomba lang.”
Giaresto ang maong lalaki una pa makahawa sa nasud ug gikustodiya na sab kini sa Sasa Police Station. Hinuon, walay flights ang naapektuhan lakip na mga pasahero.
Kasong paglapas sa Presidential Decree 1727 ang gipasaka sa mga otoridad sa Davao International Airport Police Station batok sa maong pasahero ngadto sa Davao City Prosecutor’s Office.
Ubos sa balaud, hugot nga gibawal ang bomb-joke sanglit sensitibo kaayo kini sa seguridad sa publiko.
Ang mga mapamatud-ang makalapas niini adunay silot nga 5 ka tuig sa bilangguan ug multa nga P40,000.
via || Bombo LJF
