DAVAO CITY – Nagpadayag og pag-uyon si Senator Ronald dela Rosa mahitungod sa bag-ong direktiba sa Philippine National Police kon PNP nga bawal na ang tattoo sa mga personahe sa kapulisan.
Sa nahimong pakighinabi sa Davao Media atol sa retirement ni kanhi PRO 11 regional director Brigader General Alden Delvo, gikanayon ni Dela Rosa, nga kanhi hepe sa PNP niatdong panahon sa administrasyong Duterte, nga gisuportahan niini ang bag-ong mando ni PNP chief General Rommel Francisco Marbil.
Sumala pa sa senador, buot ipasibaw sa maong mando ang pagkadisiplinado ug pagkamaunungon sa han-ay sa kapulisan.
Hinuon, wala gisalikway sa maong mando ang creative expression sa pagbaton og tattoo sa kalawasan sa pipila ka mga pulis.
Apan, angayang sundon ug respetuhon ang mandato sa organisasyon. Sumala pa nga sinugdanan pa lamang, nasayod na ang mga pulis sukad sa ilang pagsulod sa PNP nga gipasibaw na niini ang pagsunod sa mga kamanduan sa kapulisan.
Ning kasamtangan, ginatan-aw pag-usab sa PNP ang maong polisiya mahitungod sa pagpatanggal sa mga visible tattoo sa mga personahe niini.
Sumala ni PNP spokesperson Colonel Jean Fajardo, mismong ang PNP Chief ang nagpa-review sa maong memorandum nga unang gipaguwa sa panahon ni kanhi PNP Chief Benjamin Acorda.
Kahinumduman nga gi-aprobahan niadtong Marso 19, 2024 ang Memorandum Circular 2024-023 sa PNP nga nagkanayong gikinahanglan nga tangtangon sa uniformed ug non-uniformed o civilian police personnel ang ilang “visible” tattoos.
Kinahanglan usab nga mohimo sila og affidavit nga magdeklarar sa ilang mga tattoo nga dili makita, diin dili na sila tugotan nga adunay dugang nga mga tattoo sa bisan unsang bahin sa ilang lawas samtang sila anaa pa sa serbisyo.
Bawal usab magpatattoo ang mga aspiring police, ug kon aduna man, hatagan sila og tulo ka buwan aron matangtang ang ilang mga tattoo.
Gisaway kini sa daghanang mga kongresista gumikan gikonsidera kining “discriminatory” and “unconstitutional” ug nagkanayong walay kalabutan ang mga tattoo sa performance sa usa ka pulis.
via || Bombo LJF
