DAVAO CITY – Nagtuo ang political analyst nga si Ramon Belleno III nga walay kalabutan sa pulitika ang gihimong pagtuboy ni Pastor Apollo Quibuloy kang Former President Rodrigo Duterte isip administrator sa mga propriedad nga gipanag-iyahan sa televangelist.
Sumala ni Belleno atol sa ekslusibong pakighinabi niini sa Bombo Radyo Davao, pagpangandam lamang kini kon ugaling ipagawas na ang warrant of arrest batok kang Quibuloy lakip na ang extradition request gikan sa Estados Unidos alang sa pagpasikop kaniya.
Paglantaw sab sa eksperto nga walay kalabutan ang gikaingong pag-ipon og daghanang suporta alang sa posibleng pagdagan ni Vice President Sara Duterte isip pangulo sa musunod nga presidential elections sanglit dili mugunit og myembro sa Kingdom of Jesus Christ ang kanhi pangulo.
