DAVAO CITY – Miabot na sa 16 ang namatay sa grabeng pagbaha ug pagdahili sa yuta sa Davao region human sa nahitabong pag-ulan ug pagbaha ning milabayng simana.
Gikataho sab sa National Disaster Risk Reduction and Management Council nga anaa sa tulo ang nagpabiling missing, ug 11 ang nasamdan gumikan sa pag-ulan ug halapad nga pagbaha ning milabayng simana.
Gikumpirma sa Davao del Norte PDRRMO, nga dunay 7 ka tawo ang namatay sa probinsiya diin lima ang namatay sa landslide sa Kapalong, samatang tag-usa ang namatay sa mga lungsod sa Sto. Tomas ug Asuncion tungod sa pagkalumos.
Nag-antos sab ang daghanang residente sa pagkalunup sa tubig baha sa probinsya. Sa Carmen, anaa sa 80 ngadto sa 90 porsiyento sa tibuok populasyon ang apektado sa pagbaha.
Samtang 18 sa 20 ka barangay ang gibahaan gihapon, samtang 6 ang isolated pa gihapon partikular na sa mga barangay sa San Isidro, Anibongan, Tuganay, Salvacion, Mabaus, ug Brgy. Guadalupe.
Tungod kay daghang mga evacuation center ang gibahaan, daghang mga apektadong pamilya ang temporaryong nagpabilin sulod sa municipal hall ug kasamtangang nag-okupar sa mga pasilyo ug mga opisina niini.
Gikanayon sab nga nagpabiling hagit sa mga local government units ang gipahigayong relief operations tungod daghanan pang lugar ang lisod pa maabot sa mga trak.
Sa pinakaulahing taho sa NDRRMC, nasa 204,840 ka pamilya kon 772,276 ka indibidwal gikan sa 508 barangay sa Davao Region, Northern Mindanao, Caraga, Soccsksargen, ug Bangsamoro region ang apektado.
Sa maong ihap, 24,212 ka pamilya kon 91,079 ka indibidwal ang nahikling sa 341 evacuation centers; samtang 318,365 ka indibidwal kon 94,595 ka pamilya ang midangop na sa ilang mga kabanay.
Anaa sa 97 ka mga dalan ug 14 ka mga taytayan sa Davao ug Caraga Region ang dili pa gihapon maagian. Sumala sa ahensya, nasa P2.6 million nga kantidad sa damyos sa imprastraktura ang natala sa duha ka rehiyon. Samtang 47 ka balay usab ang totally damaged, ug 44 ang partially damaged.
Miabot sa 134 ka mga insidente sa pagbaha ug 36 ka mga landslides ang natala atol sa pipila ka adlaw nga pagbaha. Nasinatian kagahapon sa Davao City ang pinakainit nga temperatura karong tuiga.
Sumala sa PAGASA, miabot sa 34.1 degrees Celsius ang temperatura sa dakbayan sa Davao kagahapon.
