DAVAO CITY – Ipahigayon karong adlawng Dominggo, Enero 28 ang usa ka prayer rally nga gipangunahan ni Davao City Third District Councilor Conrado Baluran, ubang opisyal ug mga katawhan aron panalanginan ang pakigbatok sa nagpadayong people’s initiative on Charter change.
Sumala sa opisyal, anaa sa 50,000 katawo ang mudagsang sa San Pedro Square ning dakbayan alang sa maong dagkong rally.
Pagpaklaro sa konsehal nga dili kini labot sa isyu nga gikaatubang sa pamilyang Duterte, kon dili ang sumala pa nakita nga pagpanlimbong sa katawhan sa gimugnang inisyatibo aron amyendahan ang kasamtangang konstitusyon pinaagio sa paggamit sa mga programa sa gobyerno.
Pagahimoon sab ang maong kampanya sa ubang bahin sa nasud alang sa pagpakita sa pagbasura sa ginapahigayong signature campaign alang sa People’s Initiative sa pag-amyenda sa 1987 Philippine Constitution.
Lauman sab ang pagsarado sa mga nag-unang dalan sa Davao City gikan sa adlawng Biyernes, Enero 26 sugod alas-10 sa gabii hangtod Lunes, Enero 29, sa alas-5 sa buntag.
Dili una paagian sa mga motorista atol sa nasangpit nga mga adlaw ang mga dalan paingon San Pedro Street, particular na sa may dalang Bolton paingon corner CM Recto; San Pedro Street gikan corner Bolton Extension paingon Magallanes; ug Bolton Street gikan corner Rizal paingon corner San Pedro Street.
Una nang nag-rally ang mga katawhan sa Calinan kaniadtong Enero 19 batok sa naghitak nga signature campaign sa people’s initiative.
