DAVAO CITY – Subling nagpadayag og intensyon nga mudagan pag-usab si Vice President ug DepEd Secretary Sara Duterte.
Atol sa pagbisita ni VP Sara sa flag ceremony ug panagpulong sa Brgy. Bago Gallera, ning dakbayan kagahapon, mismong ang bise ang nagkanayon nga iyang nadunggan nga dili na matud pa mudagan sa musunod nga piniliay ang iyang mga igsuon nga si Davao City Mayor Sebastian Duterte ug 1st District Congressman Pulong Duterte.
Gikuha na sab sa bise ang higayon nga mangampanya kon ugaling mahinayon ang wa pagdagan sa iyang mga igsuon.
Wala pa nabutyag kon unsa ang mamahimong posisyon nga daganan sa bise presidente human sa iyahang termino.
Una nang gikabutyag sa amahan niining si Former President Rodrigo Duterte nga gitugyan na kang VP Sara ang mamahimong political plan sa pamilya, apan sa ulahing pakighinabi sa mga mamahayag, gikanayon ni VP Sara nga personal nga desisyon ang pagdagan sa pulitika ug suportahan sab niya ang mga buot mudagan sa iyang pamilya.
Atol sab sa iyang pagbisita sa Bago Gallera, naghangyo ang bise nga suportahan ang mga programa nga gipahigayon ilawom sa Office of the Vice President ug Department of Education.
Gipunting sab niya ang kamahinungdanon sa pagpakusog sa Barangay Development Council alang sa katumanan sa mga programa sa matag barangay sama sa imprastraktura, kahimisog, panginabuhian, disaster preparedness ug peace and order sa barangay.
Gidasig sab ni VP Sara ang mga ginikanan nga ihatag sa ilang mga anak ang katungod sa edukasyon nga usa sab sa mga prayoridad sa iyahang katungdanan batok sa insurhensiya, kriminalidad ug ilegal nga droga.
